D Tayri kan! Dacu icerken imdanen deg umaḍal? D anadi ɣef tayri. Waɛli d Magnus, wa di Tizi wayeḍ di Copenhagen, xas akken ur myussanen ara tecrek-iten tayri n lmuziga, tayri n tudert, tayri n temdukkal-nsen. Ana d David, Muḥsin d Raja, imezwura di London, wiyeḍ di Naḍur, xas akken yal yiwen amek i tt-yettidir, d tayri kan i ran ad idiren. Tayriwin mgaradent akken megrandent tirga. Targit n Alexandra, yeǧǧan lḥif n tmurt-is Ikwaṭuṛ, d targit Tamarikant, ma d Saṛa, d targit n tlemẓit tamarikant yebɣan ad ekk amaḍal i tuksa n lxiq. D Tayri kan d iberdan n usirem d tudert. Tudert n Loco, ɣef larulma-ines, yessishilen abrid i ikamyunen ɣef idurar n Patio Bonito. D tudert n Amadou yessishilen abrid i tkeṛyas d medden di tɣaltin n Maristes, di Sinigal. Dacu yifen tayri d unecṛaḥ n Mama Sima i igujilen-nni n ṭṛad i tettrebbi di lḥif n uɛecciw-is? D Tayri kan d tabɣest n tlawin-nni n Nirbhaya i d-sbed Bhati i uḥuddu ɣef tlawin n uzniq-nsent di Munirka di New Delhi. D tabɣest n Sheida, Nasrin, Nesiba...atg. Ama di Iran neɣ di Oslo, di Isṭanbul neɣ di Chicago, ksent, ta dačadduṛ, ta d lḥiǧab, ggan-t tiwlafin, cerken-tent di Facebook i wakken ad begnent asirem-nsent n tlelli! Ma d Jimbut d Yen, tayri-nsen d tayri n isekla. Mi fukken tuẓẓut, ad uɣalen s axxam, di taddart n ZHUXINZHUANGCUN, ad swen kra n lkisan n Baijiu, ad cnun tizlatin n Liu Yi Fei. Akka! Iberdan mgaraden. Wa fessus wayeḍ ẓẓay. Fessus-as i Karine, i Julien, i Caroline, i Mumu d weltma-s Fifi. Fessus-asen ad ruḥen ɣer uɣerbaz. Kra di lkaṛ, kra akked yemmat-sen, kra akked unehhaṛ. Ma d Arief, Yuri, Edenjevy, Faṭma Zahra d Ɛali, kra ɣef uḍaṛ, kra ɣef weɛrur n waɣyul, xas teḥṛes teswaɛt ttmagaren-d ifeṭṭiwjen n tumert, cennun tuɣac n tudert. Ameskar: Noufel Bouzeboudja Tiẓrigin: Tiẓrigin Achab